News - Հայաստանն առաջին անգամ մասնակցում է Վարշավայի անվտանգության համաժողովին ԱԳՆ մակարդակով

Մեկնարկել է Հայաստանի արտգործնախարար Արարատ Միրզոյանի այցը Լեհաստան, որտեղ Հայաստանն առաջին անգամ է մասնակցում Վարշավայի անվտանգության համաժողովին արտգործնախարարի մակարդակով։ ՀՀ ԱԳՆ-ից NEWS.am -ին հայտնում են, որ Վարշավայի անվտանգության ֆորումի նախագահ Կատարժինա Պիսարսկայի պաշտոնական ընդունելությունից հետո ԱԳ նախարար Միրզոյանը հանդիպել է այս ֆորումի հիմնադիր և Կազիմիր Պուլասկի հիմնադրամի նախագահ Զբիգնև Պիսարսկու հետ։ Զրուցակիցները մտքեր են փոխանակել երկուստեք հետաքրքրություն ներկայացնող հարցերի շուրջ, այդ թվում՝ Վարշավայի անվտանգության ֆորումի և սեպտեմբերին Երևանում անցկացված «Երևանյան երկխոսություն» միջազգային ֆորումի հնարավոր համագործակցության շուրջ։ Անդրադարձ է եղել նաև ԵՄ-ի հետ Հայաստանի գործընկերության խորացմանն ու, մասնավորապես, լեհ գործընկերների հետ համապատասխան համագործակցությանն ուղղված ջանքերին։