News - ԱՄՆ-ում Հայաստանի դեսպան. «Խաղաղության խաչմերուկ» նախագիծը կայուն խաղաղությանը նվիրվածության վառ օրինակ է (ՖՈՏՈ)
Business Strategy
ԱՄՆ-ում Հայաստանի դեսպան. «Խաղաղության խաչմերուկ» նախագիծը կայուն խաղաղությանը նվիրվածության վառ օրինակ է (ՖՈՏՈ)
Վաշինգտոնում Հայաստանի Անկախության օրվան նվիրված ընդունելություն է տեղի ունեցել, որին մասնակցել են նաև ԱՄՆ գործադիր և օրենսդիր իշխանության բարձրաստիճան պաշտոնյաներ, հայտնում են ԱՄՆ-ում Հայաստանի դեսպանությունից։ Հյուրերին ողջունեց ԱՄՆ-ում Հայաստանի դեսպան Լիլիթ Մակունցը, ով, անդրադառնալով վերոնշյալ օրվա խորհրդին, ներկայացրեց Հայաստանի անկախության 33 տարիների հիմնական ձեռքբերումները։ Դեսպանն ընդգծել է Հայաստան-ԱՄՆ երկկողմ համագործակցության հիմնական ուղղությունները՝ Հայաստանի վերանկախացումից ի վեր և վերջին տարիներին երկկողմ հարաբերությունների խորացումն ու առաջընթացը։ Դիվանագետն ընդգծել է Հայաստանի և ԱՄՆ կառավարությունների հանձնառությունը՝ բարձրացնելու իրենց հարաբերությունների ներկա մակարդակը Ռազմավարական գործընկերության մակարդակի: Անդրադառնալով տարածաշրջանում խաղաղության օրակարգին Հայաստանի հավատարմությանը, դեսպանը երախտագիտություն հայտնեց ԱՄՆ վարչակազմին՝ Ադրբեջանի հետ խաղաղության հաստատմանն ուղղված բանակցություններին աջակցելու և 2021 և 2022 թվականներին Ադրբեջանից հայ ռազմագերիներին (գերիներին) վերադարձնելու ջանքերի համար, և հավելել է, որ հայ ռազմագերիներին և կալանավորվածներին վերադարձնելու ուղղությամբ աշխատանքները շարունակվելու են։ Մակունցը նշել է, որ Հայաստանի կառավարության նախաձեռնած «Խաղաղության խաչմերուկ» նախագիծը տարածաշրջանում կայուն խաղաղության օրակարգին նվիրվածության վառ օրինակ է, և նա բարձր է գնահատել ամերիկյան կառավարության աջակցությունն այդ նախաձեռնությանը: ԱՄՆ-ում Հայաստանի դեսպանը նաև շնորհակալություն է հայտնել ԱՄՆ Կոնգրեսի հայկական հանձնախմբի երկարամյա աշխատանքի համար՝ ուղղված Հայաստանի և ԱՄՆ-ի միջև կապերի ամրապնդմանը։ ԱՄՆ պետքարտուղարի կառավարման և ռեսուրսների գծով տեղակալ Ռիչարդ Վերման իր խոսքում ընդգծել է ԱՄՆ հայ համայնքի նշանակալի ներդրումը վերջինիս զարգացման գործում։ Նա նշեց, որ հայ-ամերիկյան հարաբերություններն անցել են ժամանակի փորձությունը և շարունակում են վերելք ապրել։ Նա նշեց մի քանի օր առաջ կայացած հեռախոսազրույցի ժամանակ ՀՀ վարչապետ Փաշինյանին ուղղված ԱՄՆ պետքարտուղար Էնթոնի Բլինկենի խոսքերը. այն է՝ Միացյալ Նահանգները հավատարիմ է մնում բարգավաճ, ժողովրդավարական և անկախ Հայաստանին աջակցելուն։ Հաջորդիվ ելույթով հանդես եկավ ԱՄՆ Միջազգային զարգացման գործակալության (USAID) փոխտնօրեն Իզոբել Քոլմանը և ներկայացրեց ԱՄՆ ՄԶԳ կողմից Հայաստանում իրականացվող ծրագրերը։ Քոլմանը շեշտել է ԱՄՆ ՄԶԳ-ի կողմից Հայաստանին տրամադրվող աջակցության կրկնապատկումը 2018 թվականից հետո և նշել ԱՄՆ ՄԶԳ-ի աջակցությունը Լեռնային Ղարաբաղից ավելի քան 100 հազար տեղահանված հայերի մարդասիրական կարիքները բավարարելու համար։ Իսկ ԱՄՆ Կոնգրեսի հայկական հանձնախմբի ակտիվ անդամ, կոնգրեսական Ջիմ Կոստան ընդգծեց խմբի շարունակական պատրաստակամությունը՝ աջակցելու Հայաստանին առնչվող հարցերում, և նշեց, որ ԱՄՆ-ը ամուր կկանգնի Հայաստանի կողքին՝ որպես բարեկամ:
About usyoo
Categories
Tags
