News - Ստեֆան Սեժուրն. Հայոց ցեղասպանությունը մեծ դեր է խաղացել Հայաստանի, Ֆրանսիայի պատմության մեջ

Հայաստանի և Ֆրանսիայի միջև առկա է տարբեր ոլորտներում համագործակցության հարուստ օրակարգ։ Այս մասին երկուշաբթի առավոտյան Երևանում գտնվող Ֆրանսիայի Եվրոպայի և արտաքին գործերի նախարար Ստեֆան Սեժուրնի հետ համատեղ ասուլիսում ասաց Հայաստանի արտգործնախարար Արարատ Միրզոյանը։ Միրզոյանի խոսքով, հայ-ֆրանսիական հարաբերությունները հիմնված են երկու ժողովուրդների ամուր պատմական բարեկամության վրա, և համագործակցությունն ընդգրկում է քաղաքականությունից մինչև մշակույթ՝ անընդհատ հարստանալով նոր տարրերով։ Հայաստանի արտգործնախարարն ասաց, որ կիրակի օրը իր ֆրանսիացի գործընկերոջ հետ այցելել է Հայաստանի Վեդի քաղաքում կառուցվող ջրամբար՝ հավելելով, որ սա երկու երկրների տնտեսական համագործակցության վառ օրինակ է։ Իր հերթին Ստեֆան Սեժուրնը շնորհակալություն է հայտնել ջերմ ընդունելության համար և ասել, որ պատիվ է գտնվել մի երկրում, որը «մոտ է ֆրանսիացիների սրտերին»: Ֆրանսիայի ԱԳ նախարարը նշել է, որ կիրակի օրը այցելել է Երևանում գտնվող Հայոց ցեղասպանության հուշահամալիր և բուռն հույզեր է ապրել։ «Հայոց ցեղասպանությունը մի բան է, որը մեծ դեր է խաղացել մեր երկրների պատմության մեջ»,- նշել է Սեժուրնը։ Նրա խոսքով՝ այս հուշահամալիրի ճանապարհին ինքը հանդիպել է բազմաթիվ ֆրանսիացիների, ինչը երկու ժողովուրդների խորը հարաբերությունների եւս մեկ վկայություն է։ «Երբ պատմական ռևիզիոնիզմն օգտագործվում է պատմական հանցագործությունները արդարացնելու համար, անհրաժեշտ է պայքարել հանուն հիշողության և ստի դեմ», - ավելացրել է Սեժուրնը։ Իսկ անդրադառնալով Հայաստանի տնտեսական զարգացմանն ուղղված Ֆրանսիայի աջակցությանը, Ֆրանսիայի արտգործնախարարը տեղեկացրեց, որ առաջիկայում Ֆրանսիայից համապատասխան փորձագետ կուղարկվի Հայաստանի տարածքային կառավարման և ենթակառուցվածքների նախարարություն։