News - Հայաստանի էկոնոմիկայի նախարարը Շվեդիայի դեսպանին. Մենք ակտիվորեն դիվերսիֆիկացնում ենք մեր արտահանման շուկաները

ՀՀ էկոնոմիկայի նախարարությունից NEWS.am -ին հայտնում են, որ երեքշաբթի ՀՀ էկոնոմիկայի նախարար Գեւորգ Պապոյանն ընդունել է Հայաստանում Շվեդիայի դեսպան Պատրիկ Սվենսոնին։ Նախարարն ընդգծել է Շվեդիայի՝ որպես Հայաստանի վստահելի գործընկերոջ, տարբեր ոլորտներում Հայաստանում իրականացվող ծրագրերը, որոնք նպաստում են Հայաստանում տնտեսական բարեփոխումների շարունակմանը։ Քննարկվել են հայ-շվեդական առևտրատնտեսական հարաբերությունների ընդլայնումը, ներդրումների խթանումը, տնտեսության տարբեր ճյուղերում, մասնավորապես՝ գյուղատնտեսության ոլորտում համագործակցությունը։ «Մենք [Հայաստանը] ակտիվորեն դիվերսիֆիկացնում ենք մեր արտահանման շուկաները։ Եվ հուսով ենք, որ շուտով ձեր երկրում կտեսնենք հայկական ագրոպարենային ապրանքներ՝ գինի, մեղր, թեյ, ինչպես նաև տեքստիլ ապրանքներ», - նշել է էկոնոմիկայի նախարարը։ Հանդիպման ավարտին կողմերը ևս մեկ անգամ հաստատել են հայ-շվեդական առևտրատնտեսական համագործակցությունը զարգացնելու պատրաստակամությունը։