Հայաստանի և Արցախի (Լեռնային Ղարաբաղ) քաղաքացիական հասարակության մի շարք ներկայացուցիչներ տեսակոնֆերանսի հանդիպում են ունեցել Միջազգային քրեական դատարանի առաջին գլխավոր դատախազ, պրոֆեսոր Լուիս Մորենո Օկամպոյի հետ։ Հանդիպմանը քննարկվել են իրավական և քաղաքական գործիքները, որոնք առկա են արցախահայության իրավունքների համար պայքարելու համար, գրում է «Ապառաժ»-ը։ Այս կապակցությամբ պրոֆեսոր Օկամպոն մասնավորապես կարևորել է Ցեղասպանության հանցագործության կանխարգելման և պատժի մասին ՄԱԿ-ի կոնվենցիայի դերը՝ որպես քաղաքացիություն չունեցող ժողովուրդների իրավական պաշտպանության կարևոր իրավական գործիք։ Նաև Օկամպոն նշել է, որ ՄԱԿ-ի Ցեղասպանության կանխարգելման հարցերով հատուկ խորհրդականը հայտարարել է, որ Արցախում ցեղասպանության վտանգ կա, և դա արդեն իսկ ենթադրում է միջազգային հանրության գործելու պարտավորությունը։ Այս համատեքստում շատ կարևոր կլինի նաև, որ մենք բարձրացնենք Ադրբեջանում գտնվող հայ գերիների հարցը Ադրբեջանում կայանալիք Կլիմայի փոփոխության հարցերով ՄԱԿ-ի համաժողովի համատեքստում և ցույց տանք, որ վերջինս անմեղ մարդկանց գերի է պահում իր բանտերում։ Հանդիպմանը քննարկվել է նաև այն, որ աշխարհը ճանաչել է 1915 թվականի Հայոց ցեղասպանությունը, սակայն այն վերջնական արդյունք չի ունեցել։ Օկամպոն ասաց, որ աշխարհն այժմ շատ տարբեր է. այն ժամանակ չկար ՄԱԿ-ի քրեական դատարան, չկար սոցիալական մեդիա, հայկական սփյուռք և այլն։ Եվ շատ բան կախված է նաև նրանից, թե հայերը որքան կցանկանան պայքարել։ Նաև Օկամպոն ասաց, որ որքան էլ Ադրբեջանը հակառակը պնդի, արցախահայությունն է հողի տերը, և ամեն ինչ կախված կլինի նրանից, թե մենք որքանով ենք պատրաստ պայքարելու։ Նա արցախահայությանը խորհուրդ է տվել ավելի ակտիվ լինել իրենց իրավունքների պաշտպանության գործում.