Ուկրաինայի զինված ուժերը վերահսկում են Ռուսաստանի Կուրսկի շրջանի 100 բնակավայրեր, վստահեցրել է Ուկրաինայի Զինված ուժերի գլխավոր հրամանատար Օլեքսանդր Սիրսկին։ «Մենք [այսինքն՝ ուկրաինական բանակը] շարունակում ենք առաջ շարժվել՝ ռուսական զորքերին պատճառելով կենդանի ուժի և տեխնիկայի զգալի կորուստներ: Այսօր մենք վերահսկողության տակ ենք վերցրել 1294 քառակուսի կիլոմետր տարածք և 100 բնակավայր»,- ասել է Սիրսկին: Նրա խոսքով՝ ուկրաինական բանակը գերի է վերցրել մոտ 600 ռուս զինվորի։ Ուկրաինայի զինված ուժերի գլխավոր հրամանատարը նշել է, որ ռուսական բանակը Կուրսկից հարձակում էր ծրագրել Ուկրաինայի ուղղությամբ։ Նրա խոսքով, ուկրաինացի զինվորականների նպատակն է անվտանգ գոտու ստեղծումը, Ուկրաինայում Սումիի շրջանի օբյեկտների պաշտպանությունը և Ռուսաստանի տարածքից Ուկրաինայի գնդակոծությունների դադարեցումը։ «Հակառակորդը [այսինքն՝ Ռուսաստանը] փորձում է դիմադրել մեզ, նա իր զորքերը ուղղում է այլ ուղղություններով՝ դրանով իսկ թուլացնելով նրանց և փորձելով պաշտպանական օղակ ստեղծել մեր հարձակվող ստորաբաժանման շուրջ, նա ծրագրում է հակահարձակողական գործողություններ»,- ընդգծել է Սիրսկին։ Գերագույն գլխավոր հրամանատարը հավելել է, որ ուկրաինական բանակի հետագա գործողությունները կախված կլինեն ճակատում տիրող իրավիճակից։