Բաքուն շարունակում է պնդել, որ Երեւանի հետ խաղաղության պայմանագիր չի ստորագրվի առանց Հայաստանի սահմանադրության փոփոխության, ավելի ճիշտ՝ առանց Անկախության հռչակագրի հիշատակումը սահմանադրությունից հանելու, հայտնում է «Ազատություն» ռադիոկայանը։ Այս փաստաթուղթը տարածքային պահանջներ է պարունակում Ադրբեջանի նկատմամբ, «Ազատություն» ռադիոկայանին ասաց Ադրբեջանի նախագահի հատուկ հանձնարարությունների գծով բանագնաց Էլչին Ամիրբեկովը։ Ավելին, ադրբեջանցի բարձրաստիճան պաշտոնյան պնդեց, որ դա այս պահին Հայաստանի հետ խաղաղ գործընթացի միակ խոչընդոտն է։ Ադրբեջանը ցանկանում է վստահ լինել, որ Հայաստանի հետ կնքված խաղաղության պայմանագիրը ապագայում անհնարին կդարձնի ցանկացած վերադարձ դեպի ռեւանշիզմ կամ տարածքային պահանջներ Ադրբեջանի նկատմամբ, ասել է Ամիրբեկովը։ Ադրբեջանի համար անընդունելի է, որ Հայաստանը խաղաղ բանակցությունները և պայմանագրի վերջնական ստորագրումը դիտարկում է որպես ժամանակ շահելու մարտավարություն՝ իր ռազմական ներուժն ուժեղացնելու և այս պատմությունը նորովի սկսելու համար, հավելել է նա։