«Ժողովուրդ» թերթը, մասնավորապես, գրում է. «Ժողովուրդ» օրաթերթի տեղեկություններով՝ Երևանի ավագանու ընդդիմադիր խմբակցությունները սեպտեմբերին պատրաստվում են քննարկումներ սկսել Երևանի քաղաքապետին անվստահություն հայտնելու վերաբերյալ։ Թե ինչ արդյունք կունենան, դժվար է ասել։ Հիշեցնենք, որ Երևան քաղաքի ավագանու կանոնակարգը սահմանում է՝ քաղաքապետին անվստահություն հայտնելու որոշման նախագիծ կարող է ներկայացնել ավագանու անդամների ընդհանուր թվի առնվազն մեկ երրորդը։ Որոշման նախագծում նշվում է ավագանու այն անդամի անուն-ազգանունը, ում նախաձեռնող խումբն առաջադրում է քաղաքապետի թեկնածու, և այն պետք է ստորագրվի նախաձեռնող խմբի բոլոր անդամների կողմից։ Քաղաքապետին անվստահություն հայտնելու մասին որոշման նախագիծը հանձնվում է քաղաքապետին, ինչպես նաև խմբակցություններին։ Այդ մասին խմբակցություններն անմիջապես տեղեկացնում են իրենց անդամներին։