News - Հնդկաստանի մայրաքաղաքում հորդառատ անձրեւները համատարած ջրհեղեղի պատճառ են դարձել

Անցած գիշեր Նյու Դելիում տեղացած հորդառատ անձրևները հանգեցրել են համատարած ջրհեղեղների քաղաքի տարբեր հատվածներում, հայտնում է India TV-ն։ Մի քանի ժամվա ընթացքում Նյու Դելիի փողոցները վերածվել են գետերի, իսկ երթեւեկությունը արգելափակվել է։ Օդերեւութաբանական կայանները Հնդկաստանի մայրաքաղաքի որոշ հատվածներում գրանցել են մինչեւ 147 մմ տեղումներ։ Հնդկաստանի օդերևութաբանական վարչությունը (IMD) Նյու Դելիում 24 ժամ եղանակի կարմիր տագնապ է հայտարարել։ Բնակիչներին խորհուրդ է տրվում մնալ տանը, պաշտպանել պատուհաններն ու դռները և խուսափել անհարկի այցելություններից։ Նյու Դելիի կառավարությունը, հաշվի առնելով ներկայիս եղանակային պայմանները, որոշում է ընդունել հինգշաբթի օրը փակել բոլոր դպրոցները։ Գիշերվա ընթացքում հրշեջներն արձանագրել են ավելի քան տասը ահազանգ՝ փլուզված շենքերի և տների պատերի վերաբերյալ։ Ոստիկանությունը հայտնել է, որ Հնդկաստանի մայրաքաղաքի արեւելյան թաղամասում 22-ամյա կինն ու նրա երեխան խեղդվել են։