Ֆրանսիայի Ազգային ժողովի Ֆրանսիա-Հայաստան խորհրդարանական բարեկամության խմբի ղեկավար Անն Լորանս Փեթելն անդրադարձել է Թուրքիայի նախագահ Ռեջեփ Թայիփ Էրդողանի հայտարարությանը Իսրայելի վրա հարձակվելու և 2020 թվականին Լեռնային Ղարաբաղում 44-օրյա պատերազմին նրա մասնակցությունն ընդունելու մասին։ «Էրդողանը, ով ցանկանում է հարձակվել Իսրայելի վրա, հանգիստ բացատրում է, որ դա արդեն արել է Լեռնային Ղարաբաղում, և նա նույնիսկ օգտագործել է ջիհադիստներին՝ իր հանցագործությունը կատարելու համար»,- գրել է ֆրանսիացի պատգամավորը X-ում։ Էրդողանն ասել էր, որ իրենք պետք է շատ ուժեղ լինեն, որպեսզի Իսրայելը չկարողանա «անել այն, ինչ անում է Պաղեստինի հետ»։ «Մենք նրանց հետ կզբաղվենք այնպես, ինչպես մտանք Ղարաբաղ և Լիբիա: Սա չանելու պատճառ չկա, մենք պարզապես պետք է ուժեղ լինենք: Այսօր մենք ամեն ինչ անում ենք Իսրայելի դեմ, մենք դադարեցրել ենք առևտուրը, խզել ենք մեր հարաբերությունները նրանց հետ. », - հայտարարել է Թուրքիայի նախագահը։